PA ENTENDE LAS JURDES (Escrito en Hurdano antiguo)

 

Pa entende a una curtua,
tienis que miarti en sus ojus,
vivi sin tiempu en su segundu,
Y acostarti en su lechu.

Pa entende a las jurdes,
tienis que verti en su refleju,
anda cou a cou con sus gentis,
y soña sus mesmos sueñus.

Pa entende a las jurdes,
tienis que jabri bien los ojus,
senti comu corri la sangri de la natualeza por too tú cuerpu,
Y bebe de sus venas dejandu vola al alma sin mieu.

Pa entende a las jurdes,
olviate de las cargas,
y sienti comu te acaicia el vientu,
de pueblu en pueblu caminandu,
Con los ojus del coazon abiertu.

Pa entende a las jurdes,
abri bien tous tus sentius,
dali rienda suerta a tus emocionis,
dejate cautiva por su jistoria, su jenti y sus miterius,
y asin cuandu despiertis poas ve,
que e mas jermosa la realiad que el sueñu.