De aquellus pasus venimus,
De aquellus tiempus pasaus,
De recorrer los montis nochi y dia,
De quedarnos trabajandu elomaus,
De jace bancalis con pieas,
De labra las tierras.
De aquellus pasus venimus,
De aquellus tiempus pasaus
Del sachu y la segureja,
De guaña los campus pa pastus,
Que jecha en inviernu a las bestias,
De gana unos realis,
Pa que la casa se sustenga.
De aquellus pasus venimus,
De aquellus tiempus pasaus.
De corta y recoger pa inviernu la leña,
Pa jace el pucheru , pa secar la chacina,
Pa no pasa penuria, ni frío,
Pa jacerle frenti a la jelaz y a las lluvias,
Porque si el inviernu viene duru,
La vía será mu dura.
De aquellus pasus venimus,
De aquellus tiempus pasaus,
De jacernus jombris de prisa,
De tener el Pelu enseguia escalchau,
De jarrugas en el cuerpu y la cara,
De andar pa siempri encorvau.
De aquellus pasus venimus,
De aquellus tiempus pasaus,
De recorrer los montis nochi y dia,
De quedarnos trabajandu elomaus,
De jace bancalis con pieas,
De sembra lus guertus,
De labra las tierras.
No hay comentarios:
Publicar un comentario