ESCRIBU COMU HABLU

Escribu comu hablu y hablu comu escribu,

Pues soy de casar de Palomeru, esi es el pueblu miu,
Nació y criau a la sombra de los cerezus y olivus,
Y con mas corazón en el cuerpu que la sotana de un obispu.

Escribu comu hablu y hablu comu escribu,
Pues nunca a naie na jamas le pediu,
Ya lo tengu tou ganau y lo tengo ya tou vendiu.
De na me va a servi la casa ni el guertu mío,
Pues cuandu la señora venga a buscarmi tendre to el caminu corriu.

Escribu comu hablu y hablu comu escribu,
Pues mi escuela fue la via, la via que yo he viviu,
Trabajandu cada día en el campu como un descosiu,
Quebrándome la rabailla con la segureja, el sachu y el picu.

Escribu comu hablu y hablu comu escribu,
Na me importa a mi que no se entienda lo que digu,
Pues yo he sio mu feliz entre estas montañas metiu,
Y si se gunde el mundu que no cuenten conmigu.

Escribu comu hablu y hablu comu escribu,
Pues soy de casar de Palomeru, esi es el pueblu miu,
Nació y criau a la sombra de los cerezus y olivus,
Y con mas corazón en el cuerpu que la sotana de un obispu.

Escribu comu hablu, hablu comu escribu.